|
Монголын ХАА-н анхны хувийн сургууль болох “Монгол фермер” коллеж Европ болон өндөр хөгжилтэй орнуудын ХАА-н мэргэжилтэн бэлтгэх стандарт, арга зүй, НОУ-ХАУ, сургалт Фермерийн аж ахуйн технологи менежментийг Монголд нутагшуулахыг зорьж 14 жил ажиллахдаа Боловсролын хуучин Марксист Ленинист үзэл баримтлалыг цоо шинэ прагматик үзэл баримтлалаар сольж онол практикийн нэгдлийг хангасан жинхэнэ прагматик сургалтыг өөрөөр хэлбэл субьективизм обьективизмийн нэгдэл дунд буюу нүдээрээ харж, гараараа барьж ур чадвар эзэмшдэг фермерийн аж ахуйн сургалтын докторантаас бусад бүх шатлалын тогтолцоог бий болгож олон улсын жишигт нийцүүлэх гэж оролдлоо. Бид нийгмийн эрх ашгийн үүднээс олон нийтийн байгууллага шиг ажиллаж “Монгол Фермер” сонинг санаачлан, Монголын радиогоор “Монгол Фермерийн цаг” нэртэй төлбөртэй нэвтрүүлэг гурван жил тасралтгүй явуулсны үр дүнд жирийн малчнаас ерөнхийлөгч хүртлээ нийт монголчууд ферм, фермер, фермерийн аж ахуйг ойлгодог болжээ. Баклаврын сургалтаар 10 удаагийн төгсөлт хийж, 421 хүн төгссөнөөс, 46 хувь нь хувийн хэвшилд, 28 хувь нь төрийн өмчид буюу улсын байгууллагад, 12.4 хувь нь өөрийн фермерийн аж ахуй дээр, 3.7 хувь нь гадаадад (АНУ, Англи, Польш, Япон, БНСУ, Казакстан) ажиллаж амьдарч байна. 12.4 хувь нь хот, аймаг сумын төвд хүүхэд гаргаад хүүхдээ хараад тодорхой ажилгүй байна. 1.8 хувь нь дахин суралцаж байна. Тэдний дотроос Дорнод аймгийн Улсын аврага малчин Х.Мөнхболд, хөвсгөл аймгийн Улсын аврага ногоочин Ж.Балдандорж, Нийслэлийн аврага хадланч Архангай аймгийн Д.Батцэнгэл нар төрөн гарлаа. 2003 оноос Монгол Фермер коллежийн дэргэд Мэргэжлийн сургалт үйлдвэрлэлийн төвтэй болсон. 7 удаагийн төгсөлтөөр 456 хүүхэд төгсөж, 48 хувь нь хувийн хэвшилд, 24 хувь нь өөрийн фермерийн аж ахуй дээр, 6 хувь нь улсын байгууллагад, 10.3 хувь нь тодорхой ажилгүй, 3 хувь нь гадаадад ажиллаж байна. 2004 онд магистрын сургалтын зөвшөөрөл авч 12 хүүхэд төгсөв. Мэргэжлийн хяналтын шалгалтаар коллеж байж магистр бэлтгэлээ гээд 2008 онд хаагдав. Одоо 4 хүүхэд докторантурт (Японд 1, ХААИС-3), 5 хүүхэд магистрантурд( БНСУлсад) тус тус сурч байна. Тэд ирээд сургуульдаа багшилна. Сургууль байгуулагдсан үеэс эхлэн “Монгол Фермер” сониныг санаачлан гаргаж улсын захиалгат хэвлэл болгож, 146 дугаар гаргаж цаашид энэ нэрээр үргэлжлэн гарч байна. Сургуулийн эрдмийн зөвлөлөөс 11 цуврал эрдмийн бичиг хэвлэгдэж, багш нарын санаачилгаар “Өрхийн ногооны аж ахуй”, “Эрчимжсэн мал аж ахуйн технологи”, “Фермерийн Монгол аж ахуйн-Шинэ боломж” 2 боть, “Малчин фермер”, “Ургамлын аж ахуй”, “Монголд тариалангийн соёлыг хөгжүүлсэн хагас зуун жилд”, “Хоршооллын хөдөлгөөн”, “Газар тариалангийн технологийн суурь мэдлэгийн үндэс”, “Фермерийн аж ахуйн менежмент”, “Мал, амьтны аж ахуйн технологи менежментийн суурь мэдлэг” зэрэг ном, сурах бичиг хэвлэгдлээ. Эрчимжсэн мал аж ахуйн фермер мэргэжлийн сургалтын хөтөлбөр боловсруулж, “Сүүний үхрийн тэжээл, тэжээллэг”, “Сүүний үхрийн үржүүлэг”, “Сүүний үхрийн арчилгаа, маллагаа”, “Сүргийн эрүүл мэндийг хамгаалах”, “Сүү үйлдвэрлэх” дадлагын ажлын гарын авлага хэвлүүллээ. Үйлдвэр туршилтын 816 га газрын хөрсний шинжилгээг АНУ-ын хойд Докада мужийн Газар тариалангийн их сургуулийн хөрсний гүний лабораторид, Японы Хөрсний институтийн лабораторид иж бүрэн шинжлүүлсэн нь газар тариалангийн ажлыг шинжлэх ухааны үндэстэй хийх эхлэл тавигдсан. Манай “Монгол фермер” коллеж дээр Австри, Франц, АНУ-ын оюутнууд ирж дипломын өмнөх дадлагыг хийдэг болсон. ХБНГУ, Австрали, БНСУ, Голландын сайн дурын багш нар ирж ажилладаг боллоо. |
